TAITH UNBOXED

Mae UNBOXED: Creadigrwydd yn y DU yn teithio i fwy o drefi a dinasoedd y mis hwn mewn taith fydd yn cynnig cyfle i bobl o bob oed – gan gynnwys plant ysgol, addysgwyr a theuluoedd – gael blas ar gynnwys y rhaglen.

Gallwch fynd i ddigwyddiadau taith UNBOXED am ddim a’r cyntaf fydd dydd Sadwrn 17 Medi yng nghanolfan siopa Highcross yn rhan o Ŵyl Wyddoniaeth Prydain eleni.

Bydd y digwyddiad yn addas ar gyfer teuluoedd a bydd pobl yn gallu defnyddio technoleg sgrin werdd i saethu drwy gysawd yr haul gyda phrosiect UNBOXED, Our Place in Space, sydd wedi gweld miloedd o bobl yn cerdded o’r Haul i Pluto, wedi’i ail-greu fel llwybr cerfluniau bron i 10km o hyd yn Belfast, Caergrawnt a Derry-Londonderry.

Bydd cyfle i gymryd rhan mewn cyfres o weithgareddau rhyngweithiol hwyl yn cynnwys lliw, cerddoriaeth, rhithganfyddiad a mwy, yn rhan o brosiect unigryw a ddatblygwyd yn rhan o Dreamachine, y gwaith celf yr ydych yn ei ‘weld’ â’ch llygaid ar gau, sydd wedi syfrdanu cynulleidfaoedd yn Belfast, Caerdydd, Caeredin a Llundain. Trwy gymryd rhan, byddwch yn dysgu am eich pwerau canfyddiad eich hun ac yn helpu i fapio amrywiaeth cyfareddol y meddwl dynol.

Bydd hefyd cwis, wedi ei ysbrydoli gan About Us, y gosodwaith golau a sain anhygoel yn cyflwyno ein hanes o’r Glec Fawr hyd heddiw, y gwelodd miloedd o bobl yng Nghaernarfon, Derry-Londonderry, Hull, Luton a Paisley yn gynharach eleni.

Yn ogystal â hyn, bydd apiau am ddim i’w lawrlwytho- ar gyfer PoliNations, sydd bellach yn denu torfeydd mawr yn Birmingham, Our Place in Space a’r prosiect adrodd straeon ymgolli StoryTrails – yn galluogi pobl i brofi prosiectau UNBOXED ar eu dyfeisiau symudol.

Mae taith UNBOXED hefyd yn mynd i lan y môr yn Weston-super-Mare (19-25 Medi) lle mae SEE MONSTER ar hyn o bryd yn trawsnewid platfform alltraeth o Fôr y Gogledd sydd wedi ei ddadgomisiynu yn waith celf cyhoeddus enfawr; Cynhadledd Genedlaethol ASDC yn Glasgow (28-29 Medi); New Scientist Live yn Llundain (7-9 Hydref); IF, Gŵyl Wyddoniaeth a Syniadau Rhydychen (15-16 Hydref); a chynhadledd BEYOND yng Nghaerdydd (19 Hydref).

Dywedodd Martin Green, Prif Swyddog Gweithredol UNBOXED: Creadigrwydd yn y DU: “Roedd taith UNBOXED yn llwyddiant enfawr yn Ffair y Big Bang yn gynharach eleni, lle cafodd bron i 30,000 o blant ysgol y cyfle i brofi’r wyddoniaeth a’r dechnoleg y tu ôl i brosiectau UNBOXED. Mae’n addas i bobl o bob oed, p’un ag ydych yn yr ysgol, yn addysgwr, yn dod a’r teulu neu â diddordeb mewn syniadau eofn archwilio pwy ydym ni a ble yr ydym yn mynd. Ac wrth gwrs mae’n rhad ac am ddim.”

I gael rhagor o wybodaeth am raglen UNBOXED, sy’n rhedeg tan fis Tachwedd, ewch i’r wefan.